Ва алайкум ассалом ва роҳматуллоҳи ва баракатуҳ. Биринчи навбатда, хотиржам бўлинг ва ўзингизни айблашни ёки “иймондан ажраб қолдим” деб қўрқишни тўхтатинг. Сиз айтаётган ҳолат – қалбингизда иймон борлигининг ва шайтон айнан шу иймонингизга ҳужум қилаётганинг аниқ исботидир. Шайтон бўш, вайрона уйга ўғриликка тушмайди. У фақат ичида “иймон” деган бойлиги бор қалбларга васваса солади. Саҳобалар ҳам шундай ҳолатга тушганлар. Сиз ёлғиз эмассиз. Пайғамбаримиз соллаллоҳу алайҳи васалламнинг даврларида баъзи саҳобалар келиб: “Эй Аллоҳнинг Расули, кўнглимизга шундай гаплар (васвасалар) келадики, уларни тилга олишни жуда оғир деб биламиз”, дейишган. Шунда Пайғамбаримиз алайҳиссалом: “Бу очиқ-ошикор иймондир” (яъни, васвасадан қўрқишингиз ва уни ёмон кўришингиз иймонингиз мустаҳкамлигидан) деганлар (Имом Муслим ривояти). Олимлар айтишадики: Дилга келган беихтиёр васваса ва ёмон хаёллар инсонни кофир қилмайди. Гумон ва васваса – сизнинг чин юракдан ишонган эътиқодингиз эмас, балки шайтоннинг ташқаридан отиб турган “васвасалари”дир. Сиз уларни ёмон кўряпсизми? Демак, иймонингиз жойида! Шайтоннинг бундай фитна ва васвасаларига қарши уламолар қуйидаги амалий қадамларни тавсия қилишади: Васваса келганда дарҳол тўхтанг ва қуйдаги зикрларни айтинг: “Аъузу биллаҳи минаш-шайтонир-рожим” “Ааманту биллаҳи ва русулих” (Аллоҳга ва Унинг расулларига иймон келтирдим). Бу ҳақда ортиқча ўйламанг, фикрингизни бошқа нарсага бургизиб юборинг. Васваса билан баҳслашманг. Илм ва тафаккурни оширинг: Шайтон билимсизлик ва ёлғизликни яхши кўради. Аллоҳнинг борлиги ва бирлиги ҳақидаги оддий, аммо гўзал далилларни тафаккур қилинг. Атрофингиздаги коинот, табиат, ўзингизнинг яратилишингиз – ҳаммаси Яратгувчининг борлигига гувоҳлик беради. Зикр ва Қуръон билан қалбни суғоринг: Кун давомида кўпроқ “Лаа илааҳа иллаллоҳ” ва “Астағфируллоҳ” ни айтиб юринг. Тонгги ва кечки дуоларни, айниқса “Оятал Курсий” ҳамда “Фалақ” ва “Нас” сураларини мунтазам ўқишни одат қилинг. Муҳитни ўзгартиринг: Шубҳа ва фитна солувчи видеолар, мақолалар ёки инсонлардан узоқроқ бўлинг. Солиҳ, иймонли ва хотиржам инсонлар даврасида кўпроқ бўлишга ҳаракат қилинг. Иймонни мустаҳкамлаш учун амалий қадамлар Намозларга маҳкам бўлинг: Намоз – шайтонга бериладиган энг катта зарбадир. Дуода бардавом бўлинг: Пайғамбаримиз алайҳиссалом энг кўп қиладиган дуолардан бири шу эди: “Йа муқаллибал қулууби саббит қалбий аълаа дийник” (Эй қалбларни айлантириб тургувчи Зот, қалбимни Ўз динингда собит қил!) Я Роббим! Ушбу бандангнинг қалбидаги барча васваса, ҳадик ва ёмон гумонларни супуриб ташлагин. Қалбига ўзгинангнинг нуринг ва хотиржамлигингни сингдиргин. Уни Ислом ва Иймон йўлида собитқадам қилгин. Шайтоннинг ва нафснинг ёмонлигидан Ўз паноҳингда асрагин. Омин! Валлоҳу аълам.