Bismillahir Rohmanir Rohim. Hayz ko‘rgan ayol Qur’oni karimni ushlashi va oyatlarni yoddan o‘qishi joiz emas. Bu haqda hadisi sharifda shunday deyiladi:

عَنِ ابْنِ عُمَرَ عَنِ النَّبِيِّ صَلَّى اللهُ عَليهِ وَسَلَّمَ قَالَ "لَا تَقْرَأُ الحْاَئِضُ وَلَا الْجُنُبُ شَيْئًا مِنَ الْقُرْآنِ" (رَوَاهُ التِّرْمِذِي)

Ibn Umar raziyallohu anhudan rivoyat qilingan hadisda Nabiy sallallohu alayhi vasallam: “Hayz ko‘rgan ayol ham, junub ham Qur’ondan biror narsa o‘qimaydi”, deganlar (Imom Termiziy rivoyati).

Hayz yoki nifosdagi ayol qiroatni eshitishi esa mumkin. Zikr, tasbeh, istig‘for, salovatlarni aytib yurishi, duolarni o‘qishi va azonga javob berishi ham mumkindir.

Shu bilan birga hayz yoki nifosda bo‘lgan ayolga taaluqli quyidagi hukmlar mavjud:

• namoz soqit bo‘ladi, qazosini o‘qimaydi;
• ramazon ro‘zasini tutmaydi ammo keyinchalik qazosini tutib beradi;
• masjidga kira olmaydi;
• Baytullohni tavof qila olmaydi;
• Qur’on qiroati unga harom bo‘ladi. Agar muallima bo‘lsa, kalima-kalima qilib Qur’onni ta’lim berishi mumkin. Bunda ikki kalima o‘rtasini bo‘ladi;
• Qur’onni ushlay olmaydi;
• jinsiy aloqa qilish harom bo‘ladi. Tizza bilan kindik orasidan boshqa a’zolaridan foydalanish mumkin;
• hayz tugagach g‘usl qilish vojib bo‘ladi (“Al-Muxtor”, “Fatovoi hindiya”). Vallohu a’lam.