Qizlarim 13 va 11 yoshda. Namoz o‘qitaman lekin xar doim ham o‘qimaydi. Chunki qaynonam har gapirganimda hali vaqti bor deydi. Men qizlarimni bir o‘qib, bir o‘qimay qolishiga yuragim eziladi, u dunyoda qanday javob beraman deb.
Bismillahir Rohmanir Rohim.
Qizlaringizdan namozni talab qilishda, nazorat qilishda va shu bilan birga targ‘ib qilishda davom etavering. Sabrli bo‘ling. Alloh taolo Qur’oni karimda shunday buyurgan:
وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا
"Ahli(oila)ngizni namoz (o‘qish)ga buyuring va (o‘zingiz ham) unga bardoshli bo‘ling!" (Toho surasi, 132-oyat).
Ota-ona farzandlarining namozxon bo‘lishlariga mas’uldirlar. Mashhur sahoba Abdulloh ibn Mas’ud raziyallohu anhu esa: "Bolalaringizning namoz o‘qishlarini nazorat qiling!" deganlar. Agar bola namozga beparvo bo‘lsa, dinimizning harom-halol, odob axloq kabi boshqa masalalariga batariqi avlo e’tiborsiz bo‘ladi. Vallohu a’lam.
O‘zbekiston musulmonlari idorasi
Fatvo markazi.