Va alaykum assalom va rohmatullohi va barokatuh. Siz aytayotgan holat tabiiy hol. Chunki siz bir vaqtning o‘zida juda ko‘p narsani zimmangizga olmoqchisiz. Bu esa insonga og‘irlik qiladi. Shuning uchun o‘zingizni shunday his qilyapsiz. Birinchi navbatda, ota-onangiz ilmli bo‘lmaganlari uchun hecham ayblashga shoshilmang. Avvalo, Allohga shukr qiling sizga shunday ne’mat berganiga. Ularning davrida ilm olish uchun bunday imkoniyat va sharoitlar bo‘lmagan. Ularni ayblash, ulardan xafa bo‘lish o‘rniga qo‘lingizdan kelganicha xizmatlarini qilishga harakat qiling, duolarini oling. "Kimki ota-onasi yoki ulardan biri tirik bo‘la turib, ularning duosini olmasa, burni yerga ishqalansin" degan ma’noda hadis bor. Haqiqiy ilm olish - bu ma’lumotlarning ko‘pligida emas, balki uni hayotga tatbiq qila bilishda, unga amal qilishda. Siz ilmni betartib olishga harakat qilayotganingiz uchun shunday bo‘lishi mumkin. Chunki ilm tartib bilan olinsa, zerikish bo‘lmaydi. Har bir fanni o‘qishda o‘rganish tartibi bo‘ladi: qaysi kitobdan so‘ng qaysinisini o‘qish va hokazo. Ilm talab qilishda shunga rioya qilish lozim. Ilm o‘rganish odoblariga doir kitoblarni mutolaa qiling. Yana bir narsani ta’kidlash kerakki, hatto katta olimlarda masalan, hadis kitoblarini o‘qisa, boshqa fiqh kitoblari qolib ketayotgani, fiqhni o‘qisa, tafsir qolib ketayotganidan nadomat qilish holatlari bo‘ladi. Bir vaqtning o‘zida hammasiga ulgurib bo‘lmaydi. Tartib, reja bilan kirishish kerak. Alloh taolodan to‘g‘ri yo‘lga solishini, foydali ilm berishini duo qilib so‘rash kerak. Siz turmush qurmagan vaqtingizni g‘animat bilib, ko‘proq ishlarni, ilmlarni o‘rganishga sarflashga harakat qiling. Turmush qurganingizdan so‘ng bu kabi ishlarga fursat topa olmasligingiz ham mumkin. Musulmon kishi sog‘lig‘i va bo‘sh vaqtidan unumli foydalanishi lozim. Bu ikkisining qadri yo‘qolganda bilinadi. Alloh taolo sizga ikki dunyo uchun foydali ilm bersin. Ilm olishga harakat va g‘ayratingizni susaytirmang