Bunday savdo shar’an durust emas, chunki sotilayotgan mahsulotning narxi oldindan aniq belgilanmagan. Zero, shariatimizda xaridor pulni avvaldan berib qo‘yib, sotuvchi mahsulotni keyin yetkazib berishi – "salam" savdosi deyiladi. Salam savdosi durust bo‘lishi uchun esa sotiladigan mahsulotning (masalan, olxo‘rining) aniq miqdori, sifati va eng muhimi, kelishilgan narxi bitim tuzilayotgan vaqtdayoq belgilab olinishi shart. Keyinchalik bozordagi narxning o‘zgarishi kelishuvga ta’sir qilmasligi kerak.

Darhaqiqat, salam savdosining rioya qilinishi kerak bo‘lgan bir nechta shartlari bor. Umumiy shart – mahsulotning miqdori va sifati ma’lum bo‘lishi kerak (masalan, kilo, idish yoki metrda o‘lchanadigan yoki sanaladigan mahsulotlar bo‘lishi. Hayvonlar, ularning a’zolari, terilari va qimmatbaho gavharlarda salam savdosi bo‘lmaydi). Endi, salam bitimini tuzish uchun mahsulotning quyidagi jihatlari ma’lum bo‘lishi kerak:

1. Mahsulotning jinsi (masalan, bug‘doy),
2. Navi (masalan, “lalmi” yoki “obi”),
3. Sifati (masalan, yaxshi, o‘rtacha yoki yomon),
4. Miqdori (kilo, metr, dona yoki hajmi),
5. Vaqti (salamning eng kam muddati 1 oy),
6. To‘lanadigan pulning miqdori (bitim o‘z kuchida qolishi uchun mahsulot sotmoqchi bo‘lgan odam pulni oldindan olishi kerak),
7. Mahsulotni tashish xarajatli bo‘lsa, mahsulotni qayerga yetkazib berish joyi ma’lum bo‘lishi lozim (“Fathu babil inaya” va “Al-Muxtor” kitoblari).