Bismillahir rohmanir rohim. Namoz durust bo'lishi uchun avrat a'zolarining barchasi yopiq bo'lishi shart. Chunki, avrat yopilishi namozning farzlaridan biri hisoblanadi. Erkak kishi namozda kindigining ostidan boshlab tizzasining ostigacha yopishi farzdir (Manba: “Sharhun nuqoya”). Erkakning kindigidan pasti avrat bo'lgani kabi orqa tomondan ham kindik to'g'risidan pasti avrat bo'ladi. Ulamolarimiz avrat a'zolardan birining to'rtdan bir qismi bir muddat ochilib qolsa namoz buziladi, deganlar. Bunda ayol kishining soqi (ya'ni boldiri), erkak kishining soni alohida a'zo hisoblanadi. Bir muddat miqdori esa uch marta tasbeh aytish miqdoricha ekani bilan izohlangan (manba: “Hoshiyatut-Tahtoviy”). Yana shuni ham ta'kidlash kerakki, hozirgi kunda ba'zilar kalta shim (shortik)da namoz o'qimoqdalar. Unday kalta kiyimda belni yopganda, tizza ochilib qolishi, tizzani yopganda esa bel ochilib qolishi tabiiy. Shuning uchun har bir namozxon o'ziga qulay bo'lgan va avrat a'zolarni yopadigan keng hamda uzun kiyimda namoz o'qishi dinimiz talabidir. Ochilib qolgan a'zolarga ko'zi tushgan odamning namozi buzilmaydi. Vallohu a'lam