Bismillahir Rohmanir Rohim. Hayvonlarning go'ngidan ekinlarga o'g'it sifatida foydalanishga shariatimizda ruxsat etilgan. Bunda go'ngni qanday holatda bo'lishining farqi yo'q. Bizning hanafiy mazhabimizda go'ng najas – nopok narsa bo'lsa-da uning oldi-sottisi ham durustdir (Manba: “Muxtasarul viqoya” kitobi). Mulla Ali Qori rahmatullohi alayh go'ngni sotish durustligining sababini bayon qilib shunday deganlar:

لِأَنَّهُ يُنْتَفَعُ بِهِ وَيُدَّخَرُ لِوَقْتِ الْحَاجَةِ فَإِنَّهُ يُلْقَى فِي الْأَرْضِ لِاسْتِكْثَارِ الزَّرْعِ

ya'ni: “O'g'itni sotishning durustligini sababi, undan foyda olinadi va ehtiyoj bo'lgungacha saqlanadi. So'ngra, hosilni ko'paytirish maqsadida erga solinadi”.

Demak, hayvonning go'ngidan foydalanishga shariatimiz ruxsat beradi. Vallohu a'lam.