Ha, ushri berilgan hosil sotuvidan tushgan va bir yil davomida nisob miqdorida saqlangan puldan zakot berish vojib bo‘ladi. Sababi, ushr hosilning zakoti bo‘lib, yig‘ib olingan vaqtda ado etilgan. U sotilib, pulga aylangach, endi bu boshqa turdagi mulk hisoblanadi. Bu pul nisobga yetib, bir yil saqlangani uchun unga alohida zakot vojib bo‘ladi. Bu bir mulkdan ikki marta zakot olish hisoblanmaydi. Agar o‘sha hosil sotilmay, o‘zi bir yil saqlanganida edi, undan qayta zakot vojib bo‘lmas edi, chunki bir mulkning o‘zidan ikki marta zakot olinmaydi.

Mo‘’tabar manbalardan bo‘lmish «Roddul muhtor» kitobidagi quyidagi qoida buni tasdiqlaydi:

ولا تصح نية التجارة فيما خرج من أرضه العشرية ... لئلا يجتمع الحقان

«Ushr olinadigan yerdan chiqqan mahsulotda tijorat niyati durust bo‘lmaydi... toki ikki haq (ya’ni, ushr va tijorat zakoti) jamlanib qolmasin».

Sharh: Bu qoida bir mulkning o‘ziga, bir vaqtning o‘zida zakot va ushr vojib bo‘lmasligini bildiradi. Sizning holatingizda esa zakot ikki xil mulkka (avval hosilga, bir yildan keyin uning puliga) ikki xil vaqtda vojib bo‘lmoqda. Shu sababli ikkisini ham ado etish lozim.