Bunday vaziyatda, avvalo, zarar yetkazilgan mashina egasini topish uchun imkon boricha harakat qilish lozim. Siz uni izlaganingiz va topa olmaganingiz sababli, zimmangizdagi bu haqdan qutulish uchun endi o‘sha sindirilgan yon oynaning taxminiy qiymatini chamalab, o‘sha miqdordagi pulni haq egasining nomidan biror muhtojga sadaqa qilib yuborasiz. Bunda “O‘sha yetkazgan zararim evaziga, mashina egasining nomidan” deb niyat qilasiz. Shu bilan birga, Alloh taolodan bu xatoingizni kechirishini so‘rab, istig‘for aytasiz. Kelgusida agar o‘sha mashina egasi topilib qolsa va u sizning qilgan o‘sha ehsoningizga rozi bo‘lmasa, unga zararning qiymatini qaytadan to‘lab berishingiz lozim bo‘ladi. Bu holatda, avvalroq qilgan sadaqangizning savobi esa, inshaalloh, o‘zingiz uchun bo‘ladi.