Bismillahir rohmanir rohiym.

Ha, shunday sahoba o‘tgan. Buning sababini ko‘plab hadis kitoblarida keltirilgan quyidagi voqealarni o‘qib bilib olamiz.

Payg‘ambarimiz solallohu alayhi va sallam davrlarida Amr ibn Sobit degan kishi Islom va musulmonlarni juda yomon ko‘rar edi. Musulmonlar unga Islomni taklif qilishar, u esa rad qilar edi. Kunlarning birida Rasululloh sallallohu alayhi va sallam musulmonlar bilan mushriklarga qarshi Uhud jangiga chiqdilar. Amr ibn Sobit to‘satdan Islom va musulmonlarga nisbatan, Nabiy alayhissalomga nisbatan qattiq muhabbatni his qildi. U Payg‘ambarimizning oldilariga islomni qabul qilganini e’lon qilish uchun bordi. Unga Rasululloh va sahobalar Quraysh mushriklariga qarshi jang qilgani Uhud tomon ketganini aytishdi. Amr Uhud tomon shoshdi. Yetib borganida urush qizib yotgan edi. U musulmonlar tomonida turib jang qildi. Ammo unga qattol zarbalardan biri tegib, yerga yiqildi. Jang tugagach, musulmonlar jarohatlangan va halok bo‘lganlarni qidirib yurib, uni ko‘rib qolishdi. U og‘irlashib qolgan edi. Shunda ular Amrdan so‘rashdi:

• Bu yerga nega kelding, ey Amr? Buni qavmingni yomon ko‘rganingdan qildingmi yoki Islomga rag‘bat qilib qildingmi? Amr dedi:
• Islomga rag‘bat qilib qildim. Men Allohga va Rasuliga iymon keltirdim. So‘ngra qilichimni ko‘tarib keldim va Allohning Rasuli bilan birga bo‘ldim. Jangda yaralandim.  U shunday deb oz fursatdan so‘ng vafot etdi. Amr ibn Sobit raziyallohu anhu shahid bo‘lgan edi. Ko‘pchilik uning musulmon bo‘lganini ham bilmagan edi. Sahobalar Payg‘ambarimizdan Amr ibn Sobit haqida so‘rashdi. "U jannat ahlidan", dedilar.

Abu Hurayra raziyallohu anhu sahobalar bilan mutoyiba qilib ulardan so‘rar edilar:

• Menga aytingchi, kim Alloh taologa bitta ham sajda qilmasdan jannatga kirgan? Agar hech kim javob bermasa, Abu Hurayra raziyallohu anhuning o‘zlari: "Bu Amr ibn Sobit", deb javob berar edilar. Vallohu a’lam.

O‘zbekiston musulmonlari idorasi  Fatvo markazi.