Ва алайкум ассалом ва роҳматуллоҳи ва барокатуҳ. Бисмиллаҳир роҳманир роҳим. Балоғатга этмай вафот этган болалар қабрда савол-жавоб қилиниши масаласида уламолар ихтилоф қилганлар:

1. Имом Абул Муъин Насафий, Ибн Салоҳ, Нававий, Субкий, Ибн Ҳажар Маккий каби олимлар балоғатга этмаган болалар қабрда савол жавоб қилинмайди, деганлар. Абул Муъин Насафий “Баҳрул калом” китобида (179-бет) шундай дейдилар: “Шунингдек, мусулмонларнинг ёш болаларига ҳам ҳисоб, азоб ва қабрдаги савол-жавоб бўлмайди”. Сиз айтган ҳадисни бир қатор олимлар “ғариб”, “саҳиҳ эмас” деганлар. Аллома Субкий айтадилар: “Набий соллаллоҳу алайҳи васалламнинг ўғилларига талқин қилишлари (қабрдаги саволларга жавобларни ўргатишлари) ҳақида ривоятнинг асли йўқ”. Аллома Закариё Ансорий айтадилар: “Пайғамбар алайҳиссаломнинг ўғилларига талқин қилишлари ҳақидаги ривоят ғарибдир”.
2. Айрим олимлар эса ёш бола ҳам қабрда савол-жавоб қилинади деганлар. “Фатовои Баззозия”да шундай дейилади: “Ҳар бир руҳ эгаси савол-жавоб қилинади, ҳатто ёш бола ҳам, Аллоҳ таоло унга (тўғри жавобни) илҳом қилади”. Имом Қуртубий “Тазкира”да шундай дейдилар: “Ёш болалар (қабрдаги савол-жавобда) худди балоғатга этганлар кабидирлар. Улар ўзларининг (қабрдаги) мавқелари ва бахт-саодатларини билишлари учун ақллари комил қилиб қўйилади ҳамда сўраладиган нарсаларига жавоб бериш илҳом қилинади”. Мазҳабимизда биринчи қараш кучлироқ саналади. Аллома Ҳаскафий “Дуррул муҳтор”да айтадилар: “Енг саҳиҳ гап шуки, пайғамбарлар ҳам, мўминларнинг ёш болалари ҳам савол-жавоб қилинмайди”. Валлоҳу аълам.