Ассаламу алайкум. Кунлар совуганда, айниқса жума намозларида кўпчилик очиқ ҳавода намоз ўқишади. Оёқ кийимимни ечиб, жой намоз устида жума намозини ўқигандим. Оёғимдан зах ўтиб, белим ҳам оғриб қолди. Олдин эшитганман, оёқ кийим билан ҳам намоз ўқиса бўлади деб. Шундай намоз ўқиш ростдан ҳам бўладими? Оёқ кийимларга ҳожатхоналарда нажосат теккан бўлиши мумкин. Оёқ кийимни қоқиб, нажосат қуриб, кўринмай кетганидан кейин зарари йўқми? Бундан ташқари, агар оёқ кийим билан намоз ўқиганда, оёқ учини қиблага қаратишнинг имкони бўлмаслиги мумкин, чунки қишки оёқ кийимлар анча қаттиқ бўлади. Шу масала бўйича маслаҳат берсангиз, илтимос.
Ва алайкум ассалом. Ҳа, зарурат ва узрли ҳолатларда оёқ кийим билан намоз ўқиш жоиз, лекин унинг поклагига ишонч ҳосил қилиш шарт. Агар оёқ кийимга нажосат теккани аниқ бўлса, уни тозалаш лозим. Лекин нажосат қуруқ бўлиб, ерга ишқаш орқали ёки қоқиб туширилганда унинг асари, ранги, ҳиди бутунлай кетса, оёқ кийим пок ҳисобланади. Шунчаки нажосат теккан бўлиши мумкин деган гумон билан оёқ кийим нопок саналмайди. Саждада оёқ бармоқларини қиблага қаратиш суннат амалдир, уни имкон борича бажаришга ҳаракат қилиш керак. Аммо совуқ шароитда оёқ кийим билан ўқишга мажбур бўлиб, буни бажара олмасангиз, зарурат ўлароқ узрли бўлади ва намозингизга зарар етмайди. Валлоҳу аълам.