Ва алайкум ассалом! Умуман олганда мусулмон кишиларнинг бир бирлари билан учрашганларида саломлашишлари суннат ҳисобланади. Бу ҳақида Пайғамбаримиз соллаллоҳу алайҳи васалламдан бир қанча ҳадислар ворид бўлгани ҳаммамизга маълум. Масжидга кирганда намозхонларга халақиқ бермаган ҳолда Ассалому алайкум деб киришнинг зарари йўқдир. Лекин масжидда намозлардан сўнг кўришишни одат қилиб олиш макруҳ дейилган. Чунки доим қилинарверса, баъзи авом кишилар намоздан кейин масжидда кўришиш ибодатнинг бир жузъи экан, бу суннат экан, деб ўйлаб қолиши мумкин. Бунда ибодат бўлмаган нарсани ибодатнинг ичига киритиб йубориш хавфи вужудга келади. Қолаверса, фиқҳий манбааларда: "масжид хонақоҳида қўл бериб кўришиш-сўрашиш, дунёвий гапларни гапириш макруҳдир" ("Фатовойи Оламгирия") дейилади. Зеро, хонақоҳ фақат Аллоҳ таолони зикр қилиш ва ибодат билан машғул бўлиш жойидир. Шундай экан, саломлашишни масжид ичида эмас, ҳовлисида қилиш ва одат қилиб олмасдан баъзан тарк этиб туриш керак бўлади.