Ассалому алайкум ва роҳматуллоҳи ва баракатуҳу. Бизнинг компаниямиз “Дасёр” номи билан брендга эга ва у Республика Қонунчилигига мувофиқ 9, 36, 41, 42, 43 ва 44 синфлари бўйича патент қилинган. Шу билан бирга, бошқа бир компания “Дастёр” номи билан фаолият йуритади ва ЭРП, ПОС ҳамда WМС тизимлари билан шуғулланади. Улар бизга мурожаат қилиб, ўз брендларини 9 ва 42-синфлар бўйича ишлатиш учун биздан ёзма розилик беришимизни сўрашди. Биз уларга бундай розилик беришни кўриб чиқмоқдамиз, лекин буни ойлик тўлов (тариф кўринишида) асосида амалга оширишни талаб қилмоқчимиз. Савол: Шариат ҳукмларига кўра, бренд ҳуқуқлари (патент ва йуридик ҳуқуқлар) билан боғлиқ бундай розилик учун ойлик ҳақ олиш ҳалол ҳисобланадими? Бу савдо ёки муайян товар хизматини сотиш эмас, балки ҳуқуқий розилик бериш билан боғлиқ. Валлоҳу аълам.
Фиқҳга кўра, қонуний тартибда рўйхатга олинган бренд молиявий қийматга эга бўлган мулк ҳисобланади. Сизнинг ҳолатингизда, бошқа компанияга бренддан фойдаланиш учун ойлик тўлов эвазига розилик беришингиз, аслида, ушбу номоддий мулкнинг фойдаланиш ҳуқуқини ижарага беришдир. Бунда моддий маҳсулот эмас, балки бренддан фойдаланиш имконияти тақдим этилади. Шу сабабли, бундай келишув асосида ойлик ҳақ олиш, яъни ижарага бериш, иккала томоннинг фаолияти ҳалол бўлса, шаръан жоиздир.