Бисмиллаҳир роҳманир роҳийм.

Аллоҳ таоло инсонни барча махлуқотлар ичида энг мукаррами ва азизи қилиб яратди. Уларнинг бир-биридан мукаррамлигини эса уларни тақволарига боғлиқ қилиб қўйди. Аллоҳ таоло Қуърони каримда "Албатта, сизларнинг Аллоҳ наздидаги энг ҳурматлироғингиз тақводорроғингиздир" (Ҳужурот сураси, 13-оят) деб марҳамат қилди. Шундай экан, бирор инсон бошқа инсонни ҳатто ўз келини бўлса ҳам паст санаб, одам ўрнида кўрмасликлари айни гуноҳ ишдир. Набий соллаллоҳу алайҳи васаллам: "Мусулмон – мусулмонлар унинг тилидан ва қўлидан саломат бўлган одамдир. Муҳожир – Аллоҳ қайтарган нарсадан узоқда (ҳижратда) бўлган одамдир", дедилар (Имом Абу Довуд ривояти).

Шу ўринда бир мулоҳаза бор. Қайнота ва қайноналар барча фарзандларига: ўғил-қиз, келин-куёвларига мураббий ҳисобланадилар. Улар фарзандларининг фойдасини ўйлаб гапирган насиҳатларини муҳтарама келинларимиз ўзларининг фойдаси деб қабул қилсинлар. Валлоҳу аълам.

Ўзбекистон мусулмонлари идораси  Фатво маркази.