Бисмиллаҳир Роҳманир Роҳим. Саудиядаги аксар масжидларда, хусусан, Масжидун набавий ва Масжидул ҳаромда жума кунидаги биринчи азон ҳали пешин вақти кирмай туриб айтилади. Бу азондан кейин, агар қуёш қиём (тикка)да бўлмаса, нафл ёки қазо намозларни ўқиш мумкин. Аммо ҳали пешин вақти кирмагани учун бу жуманинг аввалги суннати ўрнига ўтмайди. Иккинчи азондан кейин тўрт ракат намоз ўқиш мудддатича имом хутбага чиқмай турса, бу вақтда аввалги суннатни ўқиб олса бўлади. Лекин иккинчи азондан кейин дарров имом минбарга чиқиб, хутбани бошласа, бу пайт суннат ўқилмайди. Чунки имом хутба қилган вақтда нафл намоз ўқиш мумкин эмас. Демак, аввалги суннатни вақтида ўқий олмаган киши жуманинг фарзидан кейин иккала суннатни ўқийди. Ҳар иккисига жуманинг суннати, деб ният қилади. Жума намози пешин намози ўрнига жорий қилингани учун пешин намозининг суннатига тегишли ҳукмлар жума намозининг суннатига ҳам тегишли бўлади. حکم الأربع قبل الجمعة کالأربع قبل الظهر “Жумадан олдинги тўрт ракатли суннат пешиндан аввалги тўрт ракатли суннатга ўхшашдир”. (“Раддул муҳтор” китоби). Валлоҳу аълам.