Ассаламу алайкум, устозлар! Мени бир савол жуда қаттиқ қайғуга соляпти. Мен катта гуноҳ иш қилганман. Балоғат ёшимда чет давлатга кетганман. Диний тушунчам бўлмагани сабабли зино қилганман – ғайридин аёл билан. Ўртада бола бўлиб қолган, лекин у аёл "сендан эмас" деб туриб олган. Лекин мен аниқ биламанки, у мендан. Саволим шуки, мен жуда қаттиқ афсусдаман қилган ишларимдан. Аллоҳ раҳм қилиб, ҳидоят берди менга. Беш маҳал намозларни ўқияпман, Аллоҳга шукр. Ҳар намозда тавба қиляпман, лекин қалбимда оғриқ бор: "Аллоҳ мени кечирадимикан" деб. Ёки қандай йўл тутишим керак бу ёғига? Узр саволим учун.
Сизнинг бу қадар қаттиқ пушаймонлигингиз, қалбингиздаги оғриқ ва Аллоҳга йузланиб, намозларни бошлаганингиз Аллоҳ таоло сизга раҳм қилиб, тавба эшикларини очганининг белгисидир. Асло ноумид бўлманг! Ноумидлик шайтондандир. Аллоҳ таолонинг раҳмати сизнинг гуноҳингиздан чексиз даражада улкандир. У зот Қуръони Каримда: «Сен (Менинг тарафимдан): «Ей, ўз жонларига исроф (жавр) қилган бандаларим, Аллоҳнинг раҳматидан ноумид бўлманг! Албатта, Аллоҳ барча гуноҳларни мағфират этар. Албатта, Унинг Ўзи ўта мағфиратли ва ўта раҳимли зотдир», деб айт» (Зумар сураси, 53-оят) деб марҳамат қилган. Сиз чин дилдан афсусда бўлиб, бу гуноҳга асло қайтмасликка қарор қилиб, истиғфор айтаётган экансиз, Аллоҳнинг ваъдасига ишонинг, У сизни албатта кечиради.
Шариат ҳукмига кўра, зино орқали туғилган болага зинокор эркакнинг насаби собит бўлмайди. Модомики, ўртада шаръий никоҳ бўлмаган экан, у аёл ҳам болани сиздан эмаслигини айтаётган бўлса, шаръан у болага нисбатан сизда оталик мажбурияти йукланмайди. Сизнинг ҳозирги асосий вазифангиз тавбангизда содиқ қолиш, ўтган гуноҳингиз учун доимий истиғфор айтиш, дин илмини ўрганиш ва солиҳ амалларни кўпайтиришдир. Аллоҳ таоло солиҳ амаллар сабабли ўтган гуноҳларни ҳам мағфират қилишини умид қилинг.