Бундай вазиятда, аввало, зарар етказилган машина эгасини топиш учун имкон борича ҳаракат қилиш лозим. Сиз уни излаганингиз ва топа олмаганингиз сабабли, зиммангиздаги бу ҳақдан қутулиш учун энди ўша синдирилган ён ойнанинг тахминий қийматини чамалаб, ўша миқдордаги пулни ҳақ эгасининг номидан бирор муҳтожга садақа қилиб йуборасиз. Бунда “Ўша етказган зарарим эвазига, машина эгасининг номидан” деб ният қиласиз. Шу билан бирга, Аллоҳ таолодан бу хатоингизни кечиришини сўраб, истиғфор айтасиз. Келгусида агар ўша машина эгаси топилиб қолса ва у сизнинг қилган ўша эҳсонингизга рози бўлмаса, унга зарарнинг қийматини қайтадан тўлаб беришингиз лозим бўлади. Бу ҳолатда, аввалроқ қилган садақангизнинг савоби эса, иншааллоҳ, ўзингиз учун бўлади.